買債最驚Default，咁包租公/婆既天敵當然就係租霸啦，呢篇文教如何預防租霸
上次有篇文講解左點樣用保險去補償租霸引致既損失
可以睇返： 英國樓系列 - 英國物業保險實例分享
今次好難得叫得郁我英國租務代理分享一份「過唔到credit check」既準租客既credit report
呢篇文主要分享幾樣野：
- 英國樓放租流程
- 放租注意事項
- 信用評級報告 (或稱 Credit Report / Reference Check)是什麼
英國樓放租流程如下：
1. 層樓成交，律師叫你安排人去指定地址收鎖匙（當地地產鋪或賣方律師行地址）
2. 你(作為新業主) 通知你既租務代理 (Letting Agent) 去收鎖匙
3. 同Letting Agent簽約 (Service agreement / Management agreement)，正式授權俾佢管理
4. Letting Agent幫你檢查一次層樓有咩要裝修，是否符合出租標準
5. 如有裝修，有服務海外買家經驗既Letting Agent一般都有埋相熟裝修公司，幫你拎報價同埋跟進工程進度
6. 裝修同時，Letting Agent就會幫你出埋招租客既廣告
7. Letting Agent接待準租客睇樓
8. 當準租客有意租你層樓，Letting Agent就會安排做reference check
9. 當準租客成功通過到reference check，就會通知你，問你要唔要租俾佢
10. 如果你同意，就會安排簽約，訂好租客幾時入住，邊日起租等等。
英國樓放租注意事項
- 英格蘭租樓一般有最短租期，蘇格蘭租務條例列明租客只需28日前通知就可以走人
- 租客的一個月按金會由Letting Agent保管 （租務條例寫明)
- 租客的Credit Report 只有Letting Agent會睇到，即使Pass左，正常都唔會俾業主睇。業主只會知道呢個租客Pass 定 Fail。
- 記得叫個Letting Agent只放租俾有意長租既人 （最少都1年啦)
- 經驗話我知唔包傢俬會比較容易搵到長期租客
- 提供埋白色電器會比較快租得出 (當地叫White Goods，即係雪櫃、洗衣機、焗爐、煮食爐、微波爐等)
- 電器如果可以買新，最好買新，通常有一年保養。二手既如果間唔中壞Q左要俾錢整，你可能會感到不爽
- Boiler (熱水爐) 如果上手業主果個運作正常就唔會換，壞左既話通常換新既大概要£1500左右，有5年保養，抵過你次次壞完又整
租客信用評級報告
重頭戲，我專程叫我個相熟Letting Agent俾左一份唔合格既Credit Report俾我睇，今次同你分享。
下面呢幅圖係首頁，通常你睇首頁都足夠，因為有評分
點睇？ 1000分為之滿分，750分為之合格，合格通常照租無死。就係咁簡單直接。
咁呢幅圖好明顯個租客唔合格啦。
想聽細節先睇落去啦
英國當地租樓文化其實比香港嚴謹好多。 香港租樓最多叫人出示卡片同糧單，而英國係會做Credit Report，並且一般逐次收費，通常業主俾錢。
Credit Report ，每次會由3間不同既信用評級公司各自去列出呢個租客以往喺不同公共機構 同埋借貸機構既紀錄，亦會顯示埋呢個租客有無案底。 你可以理解為摸透哂呢個租客個底架喇。
下圖係顯示呢個準租客喺Lloyds Bank (知名銀行)借左錢無還
好明顯佢有條數，好多個月都"Account in Default" , 呢條數唔清，想合格都難。
下圖係顯示呢個準租客喺另一間財務公司又借左錢無還
所以，無論佢欠幾多間公司既債，基本上Credit Report都會一覽無遺，無走雞。
下圖係顯示呢個準租客過去有無準時交煤氣
所以，水、電、煤、市政稅(Council Tax)等等既公共機構，有無準時交錢都係計分標準之一。
Credit Report 有成50頁，唔盡錄喇。
下一次我會寫篇文章分享，作為一個英國樓業主，大概有咩責任，呢個都重要。下次見
No comments:
Post a Comment