英國樓系列 - 細價樓治安差有租霸？

好多人問： 蘇枱蘭啲樓平，治安係咪好差？ 租客質素係咪好參差？

由於我唔係想開班或者做KOL，所以我會堅持我既溝通方式： 講左結論先，有興趣先睇理由！

答案：絕對唔會，咁多個移民客，過百間租盤，未遇過租霸。

治安差 ＝ 租金回報低？

先拆左呢個好重要既迷思先：

全香港罪案率最高既地方係深水埗，全香港租金回報最高既地方亦係深水埗，因為有劏房，回報可達20%以上。

呢個係人血饅頭，我地唔會去食，只係大家都要客觀地理解： 治安同物業投資回報並無絕對關係

而大家要明白你唔做深水埗劏房，唔係因為果度治安差，係因為你做唔出劏房呢個行為。

住貴樓就一定係好人？

我既蘇格蘭Letting Agent向我分享，佢管理梗既樓入面，其中一間個租客係Drug dealer，住3000呎獨立洋房，多年來交租仲穩定過Department of Works and Pensions (英國社會福利署，負責發放各項津貼、退休金等）。 純粹投資角度的話，你應該關注租客既承租能力同穩定性，而不是佢既道德水平。

唔好搞錯我意思，唔係話要專登租俾爛仔，而係唔好覺得你層樓夠貴，租果個就一定係好人。橫掂都唔交租，做乜唔租貴樓？

做好租客審查 及 買足保險，現金流就有保證

平時你喺香港租樓，頂多睇糧單、同埋個租客既卡片。蘇格蘭租樓，係睇埋租客既信用評級，要check哂佢既收入、過去3年住邊、有無欠交水電煤稅紀錄，有無欠過上手業主租，有無惡意破壞過上手業主物業，我地稱為reference check，衰左既話佢連信用卡都無用。 

另，蘇格蘭有得買保險去賠償租客唔交租，引致既租金損失 同 法律費用，以及因租客惡意破壞物業而產生既維修費用。下次我直頭post埋份保單出黎俾大家參考。 細價樓既話，保費一年大概£200-350，視乎具體情況。

唔係叫你要買蘇格蘭呀，係唔用錯誤既觀念 同 指標去做投資呀。

下面有彩蛋 

蘇格蘭治安差？

英國有好多唔同地區，我地要睇既係每個地區各自既罪案率。

下圖顯示，蘇格蘭地區係全英國咁多個地區罪案率最低既地區

Source: https://www.statista.com/statistics/866788/crime-rate-england-and-wales-by-region/

仲有好多統計數字架，唔好淨係信呢個，google多10個統計睇，你會發現答案係一致既

全英治安最好既城市叫做愛丁堡（Edinburgh），都喺蘇格蘭。

然後睇下蘇格蘭10年既罪案率趨勢，係持續下跌既 (見下圖)

Source: https://www.understandingglasgow.com/indicators/community_safety/overall_crime_rate

睇埋英國走佬界KOL熱捧既曼徹斯特，會有更鮮明既比較

https://travel.ulifestyle.com.hk/news/detail/33004/%E8%8B%B1%E5%9C%8B%E7%BD%AA%E6%A1%88%E7%8E%87%E6%9C%80%E9%AB%98%E5%9C%B0%E5%8D%80%E6%8E%92%E5%90%8D-%E5%80%AB%E6%95%A6-%E6%9B%BC%E5%BE%B9%E6%96%AF%E7%89%B9%E5%85%A5%E5%8D%81%E5%A4%A7/1

最強槓桿，做自己認為有意義的事情比一切重要

心血來潮，想寫一篇文章分享自己學習創業同投資既初衷。

迷妄是因為想認真尋覓

小弟今年31歲，大學時修讀Marketing，作為一個不是知名大學畢業既商科Fresh Grad,，無乜特別專業知識技能，唔知自己擅長啲乜，應該做啲乜，乜野先有長遠發展，自畢業後做過好多唔同行業嘅銷售工作。頭3份工都係重工業，第一份係福耀玻璃，世界最大既汽車玻璃製造商，幾個月之後頂唔順大陸公司文化走左。之後做過鋼材貿易公司，出口中國鋼材去印度、越南、泰國等國家，又做過新加坡農藥公司，出口農藥去澳洲、紐西蘭。 我做過德國手機配件公司，做過財仔打cold call叫人借錢，做過兒科醫生marketing助手，做過保健品OEM工廠Sales,，做過IT solution sales，做過保險科技start up公司sales。 夠雜未，講迷妄，講無毅力我都算係高手，而我後唔後悔呢？ 完全唔後悔，我好感恩自己浪費過咁多時間；我好感恩過去自己all in 瘋狂喺唔同行業學習，即使捱窮，即使要做好下欄既工作。（有機會再同大家分享不同行業既趣事見聞）

搵出自己有熱情既主題，自然就會知道要學乜野

8年內不斷更換工作，話唔攰你都唔信。見到自己既舊同學一個又一個喺自己既領域有所增長，我反思自己其實想做乜，為咩呢？

我發現原來自己咁多份工，離不開對3件事情既嚮往：

1. 外國生活 - 我份份工都係想衝出香港呢個小城市，見識下呢個世界，珍惜生活喺地球既機會。唔係講笑架，世界唔大，咁多唔同既事物，唔去發掘真係哂左

2. 影響別人 - 我鐘意喺銷售既過程帶領別人用我見到既角度去睇一件事情，發現新既可能性。得到別人既信任同認同，真係好有滿足感

3. 創業 - 我好鐘意呢個課題，因為我覺得創業既人好勇敢，所以我每份工都會搵出裡面幫到自己創業既知識、技能、心法。

呢3個主題，不停重覆出現喺我既人生，我開始明白自己既Pattern。

唔係無機會，係當清楚自己既主題先至見到機會

3年幾前，機緣巧合有間移民公司既老闆話佢公司既負責人要離職，佢問我：後生仔，你有無興趣過黎一試？ 我用左一晚時間考慮就答應左。 呢份「工作」無底薪、我無任何經驗、無指引、無任何客底介紹、無任何budget。 咁有啲咩？ 有股份（唔駛俾錢投資），有自主權（自己定業務方向，自己諗點跑數賺錢），Office豬肉枱有個位俾我坐，有信任，有支持鼓勵，有挑戰，可以建立自己既班底，有承擔既機會。最重要係咩？係符合哂我人生3大主題！

錢只係工具，用黎協助自己做最有意義既事

人生其實唔係講錢，係講有無為自己做既事情感到自豪，感到驕傲，有無把握機會過自己理想既生活。好多人都重視投資理財，重視點樣利用槓桿。須知道，投資也好，創業也好，甚至移民也好，都只係一個槓桿，用來協助你過理想生活。 過度專注利用槓桿，會令人「見利忘義」忘記左自己當初追求乜野意義。

寄語：槓桿是個好東西，而最強大既槓桿其實係利用自己既熱情，去做最想做既事情，咁唔單止可以賺到錢，仲可以喺逆境時保持能量，持之以恆。 槓桿唔係得孖展戶口，亦唔係得借錢買樓，你既技能、人脈、網上既平台、甚至乎外國既生活環境都可以係一種槓桿，唔好忘記自己優勢同與生俱來既創造力、適應力，一齊加油。

英國樓系列 - 實戰收租組合回報分享

要學任何野，都要需要堅持同埋動力。英國樓同香港樓完全唔一樣，真係要研究有好多細節，悶死你。上次解釋過買細價樓收租有咩好 同埋 點解唔好買一手新樓。今次直頭得到我既一位已經移左民去英國生活既香港客允許，分享佢個蘇格蘭細價樓收租組合既回報。希望讀者睇完，覺得呢個回報值得去研究，先至再花時間去學習細節。

真實數據

呢位客戶用左半年時間，建立左一個收租組合，全部都係買細價樓返黎簡單裝修後直接出租。

呢個組合，用左£370,000去建立，合共8間屋，平均每間用左£46,300，分佈喺唔同既Town，每年產生淨現金流£31,900，租金回報率13.17%，實際回報率達8.6%，有保險cover維修同租霸風險，未開任何槓杆。

目標為本，簡單就是美

我呢位客戶投資既目的就係用每月現金流去支付佢一家四口喺Bristal (英國南部既城市) 既部分生活費，唔駛急住搵工。佢仲未買完，因為佢其實唔係好想返工，而且佢完全唔想靠樓價升值去食糊。佢都係逐間買，每次睇岩先細注買一間，租得出又下一間，而唔係ALL IN 一層幾百萬既倫敦樓然後祈禱唔好出事。 我知有好多人想學點樣靠劏房分租、買殘舊既樓重建加建，然後賺更高回報，而最終成果未必好得過簡簡單單買返黎租俾人就算。不如將心思放喺其他投資啦。

咁樣諗會快樂好多！！！

370萬現金，老實講都唔係宜家既90後年青打工仔可以無啦啦拎出黎。如果又想有樓，又唔想買香港樓既年青人，46萬港幣就可以full pay買一層收13厘租，由第一間開始，就當做一個安全網俾自己走資，並且每個月有幾千蚊可以用黎供Tesla / Bitcoin / ARKK 等等一系列有風險、高回報、一般人唔會All in 既投資物。

下次再公開更多作為英國樓業主既細節。

移民系列 - 移民快速測試

今集要令所有讀者最快速度明白移民係咩回事，有咩主要方法，以後你唔駛再去移民講座。

信我啦，幾咁古怪既移民計劃我都聽過同接觸過（除左偷渡），作為一間移民公司，間唔中就會有啲服務供應商（行內叫「項目方」）主動接觸傾合作，叫我sell佢提供既移民Plan，所以用我呢個方法，好難錯得去邊。

溫書： 移民成功  ＝  拎到永久居民

正常普通人，唔計結婚、唔計難民、唔計政治庇護，歸根究底，只會用3種方式移民，呢3個方法都係一人成功，配偶同小朋友都會一齊成功：

1. 技術移民 - 國家需要你的勞動力 及 專業 （一般45歲前）

最多人用呢個方式移民，佢有好多細分既通道既：

a) 「優才」移民 - 最經典就係攞哂獎既知名學者、藝術家、運動員、演員、音樂家、特殊人才

b) 計分制 (Point-based) - 你夠分即係你夠技術，直接俾你移民，4大熱門移民國家「英 美 澳 加」都有，唔夠分就要儲條件，令到自己夠分為止。主要睇一個人既年齡、學歷、同一份工既工作經驗、英文能力（考IETLS)、有無搵到當地工作、有無直系親屬住當地，下次再分享點快速自我計分。 

c) 僱主擔保 - 當地僱主搵極都搵唔到當地人做呢份工，於是請左你，然後向政府申請擔保你移民。呢份工你一係憑實力搵返黎，一係靠親戚關係，一係俾錢買。

d) 讀書移民 - 其實讀書唔可以直接令你移到民既，舉例你去加拿大讀完個碩士，人地唔會直接送個永居身份俾你。 讀書有2樣好處：1）畢業俾個簽證你留低搵工，搵到就用僱主擔保移民啦；

2）喺計分制會加你分，變相鼓勵多啲人來留學，振興經濟。

有極少數例外既plan係齋讀書唔駛搵到工都有永居，可惜只開放俾超一流大學既尖子學生。如果你係，老實，你唔想睇我呢篇文。

2. 創業移民 - 國家需要你創造就業職位 及 經營一段時間 （一般55歲前）

a) 通常對於學歷、年齡、英文能力都好寬鬆。反正唔係預你過黎自己做野，係預你請當地人做野。

b) 有啲國家一定要你本身做開生意（無得呃），然後再去當地成立新生意，或者入股當地人既生意，請幾個當地永久居民做員工，公司營業額又達到要求，就攞到永久居民。

c) 有啲國家唔駛你本身做開生意，總之過去創業，做夠幾年，請夠當地人，就攞到拎永居。

下次再同大家分享邊啲國家要有做生意經驗，邊啲國家唔駛。 總之你無信心做生意，亦唔想學點做生意，盡量唔好呢條路。反之，樂觀睇，你夠膽學做生意，好多條件就會量化寬鬆，公平呀。

3. 投資移民 - 國家只需要你的錢 及 投放一段時間 （一般55歲，某啲國家無限制）

a) 投資金額通常較大 - 由幾百萬港幣起 至 幾千萬港幣，成功投資到就得，4-5年內唔好撤資就得，唔旨意你要做咩生意

b) 資金來源審查 - 唔好以為用錢解決就好容易，英美澳加紐 對於投資者既資金來源審查好嚴格，怕你洗黑錢

c) 有時路駛坐移民監 - 某啲國家既投資移民計劃無居住要求，唔駛住都拎到永居同護照，行內稱為「護照項目」，英美澳加紐唔駛諗。 

d) 買樓移民 - 喺英美澳加紐 買樓，完全幫唔到你移民，唔好再信任何中介話會幫你加到分。仲容許你買樓就移到民既國家，通常都係歐盟國家或者中美洲國家，經濟狀況一定差，純粹想你以極高溢價托市。 

PS: 馬來西亞第二家園，買完樓只會俾個簽證你，每10年續一次，永遠唔會有永居身份，所以唔算係移民，最多叫移居。

今次搞清楚主要有咩路線可以移到民，總之你知道萬變不離其中先，唔好陷入無限搵資料同聽講座既輪迴。下次先講點快速知道自己可以行邊條路線。

英國樓系列 – Glasgow格拉斯哥二手細價樓

我自己移民客同朋友都知，我係十分睇好蘇格蘭嘅樓市，尤其是係高Yield嘅細價樓，因為我係一名現金流投資者，唔喜歡以投機心態去估個樓市會升定跌。呢篇文章希望同大家分享幾個我選擇Glasgow格拉斯哥嘅原因。 

租務市場強勁 - 空置率低，新樓供應數量極少

Glasgow住宅空置率好低，得大約2.2% （香港3.8%，唔好以為好低，倫敦1.6%）由幾年前到現在，我既客戶喺當地投資嘅物業都係保持出租嘅狀態，穩定地提供現金流。Glasgow當地嘅1-3房物業，平均22-28日內就會成功出租，好快就開始產生現金流。好少英國嘅城市喺可以有咁快嘅出租速度。 而且，當地人口流動性唔似倫敦咁高，好多時都係一租就租幾年。如果你個Agent掂，幫你揾啲有政府資助既租客，一簽就係5年喇。

租金承接力足夠有突 - 租金佔打工仔收入唔夠1 / 3

當地基層打工仔平均月入£2,000，一個大概40sqm 既一房Apartment租金由每月£325 - 375都有，如果係大概60-70sqm既兩房Apartment租金由每月£450 - 500都有。當然視乎地段、戶型、屋內質素、租金可以更貴。而我想帶出既係，當地租樓既租金，唔會好似香港咁過份。大家唔好用果啲高收入專業人士去諗，用普通一個大學生岩岩喺香港畢業出黎既收入去諗，普遍得HK$12000 - 18000一個月，如果自己出黎租樓住，除非住劏房，否則起碼一半，甚至2 / 3 人工俾左業主。 而我喺Glasgow既樓，租金只佔當地普通人大概25%， 佢俾埋Council Tax，俾埋水電煤，都係唔駛1 / 3 既收入已經生活到，而且個生活空間係有尊嚴既，唔係劏房，唔駛Share House。

穩定現金流 - 不依賴留學生，不依賴高端/中產租客

租客質素方面，我一定係揀土生土長嘅當地居民，只要reference check做得夠好，其實租金係好穩陣，我到目前為止暫時都未遇到過所謂租霸。揀本地租客仲有一個好處，就係佢地個個 (99%) 都有資格攞政府既救濟性福利，而非新移民或留學生。當然，我有好嘅Letting Agent為我把關，佢地絕對應記一功。 同時，只要買齊相關保險，就已經可以保障到因租客唔交租所產生嘅租金損失、法律支出，同埋日常家居維修保養嘅部份費用，現金流絕對穩定。 

注碼較容易控制 - 每層樓平均45-60萬港幣

以同類樓宇種類計算，Glasgow嘅樓價比其他英國嘅城市平2-3成，有時甚至乎更多（視乎同邊個城市比較）。買一個兩房Apartment，都係4.5至6萬鎊，換言之，好多人按左香港層樓，喺Glasgow 已經可以買幾間，入場門檻好低。如果你選擇左喺倫敦、曼城、伯明翰度買樓，質素好少少都要£30萬鎊起，你買唔到好多注，一間租唔出你就好頭痕。投資最重要風險管理，分散投資就可以大幅減低避免因為單一錯誤而做成嘅損失。我每一位客戶都透過呢個方式成功建立低風險，並且回報合理嘅英國樓投資組合。

今日講住咁多，下次分享我一個真實客戶，準備移民英國前，買左8間High Yield樓收租既案例真實數據。我唔係要sell人買，我係想睇既人知道，成功唔係得一條路，你唔應該接受「貴一貴既價錢買層200呎既樓然後供佢一世」呢條方程式！ 如果一定要買樓，如果40-50萬就full pay到一層樓，年年袋7-10%現金流俾你再投資，我地係咪可以重新思考一啲野呢？

做乜唔買香港樓

哇呢個topic，簡直係留港派 同 移民派 兩大派別之戰呀，一邊覺得啲樓要跌，一邊覺得宜家買入黃金時機。我既職業加埋我又有入下啲買樓group，令我同時睇到兩派人士既睇法。

本來，小弟都以為要喺香港財自，一定要靠買香港樓，我甚至俾埋錢報班學買樓。 令我改觀既係我一個移民去澳洲既客戶。佢Join左最貴果個移民plan，俾左100萬澳幣（無得攞返果種），咁我梗係要問佢做邊行啦，咁鬼疏爽，原來佢係某間投資銀行入面負責上市業務既Director。言談間發現原來佢做左咁多投資銀行，幫過好多間公司上市，佢自己都唔無買過股票，都係投資債券再開槓杆，獲取好高既現金流回報（1x%)，佢話債券勝算高好多。

我係因為見到呢個真實既例子，我先開始上網學咩叫債券，咩叫現金流投資，發現左風中追風兄、Starman、皮老闆，先至知道原來呢個世界咁大，成功唔係得一招，輕資產都可以做到財自，唔係一定要有神級揀股眼光先可以財自，平凡人都做到。

宜家唔想買香港樓既原因主要有幾個： 
- 真係唔想靠收香港人租金去生活，因為香港住屋成本實在太貴。樓價繼續升，香港人均收入無升，係一件好痛苦既事，我唔想加入去呢個行列一齊去托市。

- 香港住宅租金回報實在太低，一般都得果2%唔夠，如果唔計物業升值，其實就無乜賺。咁其實一邊租樓住，一邊每個月儲蓄供一啲有5-8%年息既輕資產，複息效應底下，要贏到買樓唔係無可能

- 我層英國樓，租金回報每年12%，扣埋稅我每年都淨袋7%以上，600幾呎。你叫我點樣接受要800幾萬買層香港蝸居？如果我明明可以唔駛祈禱層樓升，都賺到7%，我做乜要逼自己接受2%唔夠＋要同一眾收成期業主一齊吹奏樓價繼續無限升幅先？如果我做到，咁會唔會睇緊呢篇文既你都做到呢？

寫呢篇文章唔係要反對人買樓，係想俾一啲同我一樣想尋求其他出路既讀者知道，大把人唔靠樓財自，唔好自卑，唔好怯。 無樓唔會死人，無收入先可能會死人。 無樓唔會輸一世，怯你就真係會輸一世。

移民系列 - 移民基礎心法 (一)

寫呢個Topic係因為小弟由2019年7月至今，親身接觸既移民客人實在多到一個點，大約都有1500個左右，各行各業各階層，水渠工又有，運動員又有，校長又有，連導演都有。移民我入左行3年幾，我估我都幾了解香港人嘅移民心態。在此分享一啲我見到嘅現象，同埋點樣既諗法會令人移得開心啲。

先定義左乜野係「移民」先

唔好覺得奇怪，中國大陸人 同 香港人對呢件事既睇法係好唔同架。

如果你只想去某一個國家居住，唔需要拎當地既國籍、福利、工作權利，呢啲叫「移居」，理論上你唔需要做啲咩申請，直接去，開心就好。一個旅遊簽證都夠你逗留好耐，香港特區護照同BNO都可以享有好多國家免簽證既入境待遇（以後係點唔好問我，我估唔到）。

如果想全家喺某一個國家落地生根，長期工作、生兒育女、了此餘生等等，咁真係要拎到永久居民身份先得，當拎到永久居民果刻，你就叫做「移民」成功了。

移民第一樣野要考慮乜野？ 

唔係去邊度，亦都唔係錢，係時間！

合資格既移民顧問（唔係講緊我），第一句一定係要問左你想幾時走先。個個國家申請時間唔同，政策唔同，你要唔要等埋公務員退休果份長糧先動身出發，係好大分別架！香港人最鐘意去既英、美、澳、加，通通都要坐移民監先拎到永居，你如果打算3年後先走，今日無野好做。

移民最多人解決唔到既係乜？

可以話係錢，而仔細啲咁睇就唔係錢，而係去到果個國家點揾錢維持生計 (Operating Income) ；同埋離開香港要放棄幾多錢 (Opportunity Cost)。 始於揾食唔容易，香港既白領同專業人士做下research就知去到外國要揾返宜家既收入、做返宜家既職位係咁難。 

咁其實移民為乜？

我自己既客戶入面，80%以上會答：為左小朋友。 有少量客戶會答：為左少啲中國人。 其實最好就唔好咁諗啦。 如果你移完去唔開心，生活品質 （不應該只是物質）無提升，咁小朋友都唔方開心，你亦可能幾年後會想回流。同時，全球人口最多既種族係邊個，全球最喜歡移民既種族係邊個，呼之欲出，你懂的。

點先移到民？

拿，又咁講，換言之個任務唔係一定要做返同香港一模一樣既野，而係要令到自己喺當地生活時 Income > Expense 同時 生活得開心，方法好多，願唔願意改變自己就見人見智。我之後再寫文同大家分享一下啲成功案例，佢地成功唔係因為有錢，係因為佢地嘅想法 同 做法不一樣。

英國樓系列 - 我當初選擇投資英國二手樓的原因

小弟喺2020年年中，買左一個位於蘇格蘭既細價單位，2房，大概50萬港幣，宜家已經成功出租左，租金回報過10% (扣埋雜費、扣埋稅，淨袋大概7%)

過去半年，我同我嘅移民團隊都深深感受到香港人對英國置業同買樓投資嘅熱切需求。我發現仍然有好多朋友即使計過數後明知二手樓嘅回報係比新樓更好，都仍然會被美輪美奐嘅裝修圖片同部分英國地區嘅發展概念深深打動，移民同投資嘅Budget係得咁多，本金有限，咁應該點揀好呢？

開始接觸英國樓投資時我都做過好多資料搜集同分析，最後揀左蘇格蘭既細價二手樓作為我 同埋 我啲移民客英國樓投資既核心。我想同大家分享返點解我仍然認為呢個策略可以持續有效地為我同你帶來穩利同豐厚嘅回報。

預期回報比新樓高

咁先至有值得投放時間同本金嘅價值。我就可以專注於控制風險，而唔需要投放太多時間尋找萬中無一既「筍盤」。其實唔難發現地產發展商賣新樓時幾乎賺取哂整個物業嘅「水位」，並且佢地透過專業嘅包裝、促銷、定價操作完全掌握住新樓盤嘅供應，所以盈利空間真係好細。

避開同發展商爭利

有實力嘅發展商必然比我擁有更加多數據同「內幕消息」，即使某個地區真係好有發展潛力，樓價可望上升，佢地大可以將未來升幅預先加喺新盤售價上高，然後再以地區發展概念作為包裝推出市場，無必要將盈利空間留俾新樓買家。

二手樓投資靈活好多

我可以透過我嘅知識、人脈去發掘投資機會。二手樓嘅賣家一般都係當地居民，而唔係專業機構投資者，有議價空間，甚至乎有時因為資訊落差，令我可以大幅低於市價買入租金回報高嘅物業，即使樓市唔升，我都已經賺左。

新樓售價常常比同區二手樓高

而為左穩定地租出物業，租金係唔能夠提高好多架，否則就會同當地嘅購買力脫節，所以新樓既租金回報率其實唔會比起二手樓高，而且無得議價。

以上幾點就係我認為英國二手樓投資比新樓更勝一籌嘅原因，亦係穩定地大幅獲利既關鍵元素，缺乏左其中一項，我係絕對唔夠膽隔山買呢隻蘇格蘭牛，希望呢篇分享能夠俾到啟發大家。

向財自＋旅居出發啦！！！

Hello !! 小弟叫艾維斯，做過好多唔同行業，都係為左有一日可以財務自由，然後去下唔同國家同地方生活下，做自己喜歡既事，唔好俾金錢控制自己成世。2019年因為睇完皮老闆、風中追風兄、Starman既現金流為王，十分欣賞唔靠買香港樓財自，同埋以現金流為主嘅投資之道，於是就新手入坑去左開IB。

呢個blog主要會分享去不同國家既移民資訊、移左民去英美澳加之後點揾食、買英國細價樓收10%租既真實分享、我學習期權投資既分享，同埋一啲生活點滴，話說小弟由畢業到現在做過好多行Sales，都有啲趣事可以同大家分享。

今日係2021年1月7日，我既目標係2024年財自！！！